“Azərbaycan-Ermənistan barışığının əsasını Rusiya, Azərbaycan və Ermənistan liderləri arasında üçtərəfli sazişlər təşkil edir (2020-2022-ci illərdə əldə olunub)”.
Birinci24.com xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə bildirib.
Diplomat qeyd edib ki, Rusiya hazırda üçtərəfli sazişlərə alternativin olmadığını hesab edir:
“Ermənistanda da indiyədək heç bir yüksək rütbəli nümayəndə onlardan imtina etməyib və ya bu sənədlərin etibarsız olduğunu bəyan etməyib. Bu sazişlər Bakı ilə İrəvan arasında normallaşmanın bütün əsas yollarını əhatə edir, o cümlədən sülh müqaviləsinin inkişafı, sərhədlərin delimitasiyası, demarkasiyası, regionda nəqliyyat kommunikasiyalarının açılması, vətəndaş cəmiyyəti vasitəsilə təmasların inkişafı. Onları sorğu-sual etmək cəhdləri son dərəcə təhlükəlidir və ikitərəfli münasibətlərin davamlı nizamlanmaması kontekstində tərəflərin qarşılıqlı öhdəlikləri boşluğu yarada bilər”.
Diplomat bəyan edib ki, Azərbaycan və Ermənistan liderləri konstruktiv dialoqun davam etdirilməsinə sadiq olduqlarını təsdiqləyiblər, öz növbəsində, Rusiya prezidenti Moskvanın üçtərəfli razılaşmalar əsasında normallaşma prosesinin bütün sahələrində bundan sonra da lazımi köməyi göstərməyə hazır olduğunu vurğulayıb.
