“Ekstremist” materialların yayılmasına görə inzibati ittihamla Minskdə həbs edilmiş və Azərbaycana ekstradisiya təhlükəsi ilə üzləşən bloger Roza Babaxanyanın (Bella) Ermənistana aparıldığı bildirilir.
Birinci24 informasiya agentliyinin məlumatına görə, bu barədə “Çiçəklənən Ermənistan” partiyasının lideri, iş adamı Qaqik Tsarukyanın mətbuat katibi İveta Tonoyan məlumat verib.
Roza Babaxanyanın fevralın 15-də həbs olunduğu bildirilir.
Bloger Aleksandr Lapşinin sözlərinə görə, Roza Babaxanyan Cinayət Məcəlləsinin beş maddəsi – nifrətin qızışdırılması, müharibə təbliğatı, adam öldürmə və ya sağlamlığa zərər vurma hədəsi, dövlət məmuruna böhtan atma və təhqir etmə ilə təqsirləndirilir.
Lapşin əlavə edib ki, Babaxanyan Azərbaycan hakimiyyətinə təhvil verilə bilər.
Ermənistanın Belarusdakı səfirliyindən isə bildiriblər ki, Lapşinin məlumatı həqiqətə uyğun deyil.
“Reform” yazır ki, bloger Babaxanyan Belarusa məxsus “EW-301PJ” nömrəli hökumət biznes təyyarəsi ilə gətirilib.
Bu təyyarədən yüksəkvəzifəli məmurlar, eləcə də Belarus Prezidenti Aleksandr Lukaşenkonun oğulları – Viktor və Dmitri istifadə edir. Nəşrin yazdığına görə, onun azad olunması üçün öz əlaqələrini işə salan Tsarukyan Lukaşenko ilə yaxın əlaqələrə malikdir.
Roza Babaxanyanın son 27 ildə Belarusda yaşadığı bildirilir.
“Vyasna”nın məlumatına görə, onun Ermənistan və Belarus vətəndaşlığı var.
O, bloqunda Azərbaycan hakimiyyətini tənqid edirdi.
