Ermənistanın Baş naziri Nikol Paşinyan, Türkiyə Prezidenti Rəcəb Tayyib Ərdoğanın dəvəti ilə İstanbulda səfərdədir.
Birinci24 informasiya agentliyi xəbər verir ki, iyunun 20-də Ərdoğan və Paşinyan İstanbulda, Dolmabağça Sarayında görüşəcəklər.
Görüşün Prezident İlham Əliyevin Türkiyəyə səfərindən dərhal sonra baş tutması da diqqət çəkir.
Ərdoğan və Əliyev iyunun 19-da Kahramanmaraşda “Azərbaycan məhəlləsi”nin açılışında iştirak ediblər.
Paşinyan, bu həftə Praqada keçirilən tədbirdə Türkiyə və Azərbaycanla aparılan danışıqları müsbət qiymətləndirib, dialoqun əvvəlki illərlə müqayisədə daha şəffaf və birbaşa şəkildə aparıldığını bildirib.
Paşinyan səfərinin “tarixi” olduğunu deyib. Bu səviyyədə ilk rəsmi səfərin Ermənistan-Türkiyə münasibətlərində yeni mərhələnin başlanğıcı ola biləcəyini vurğulayıb.
Tərəflər arasında 2021-ci ildən bəri davam edən normallaşma prosesində hələlik tam diplomatik əlaqələrin qurulması və sərhədlərin açılması kimi məsələlərdə konkret razılaşmalar əldə olunmasa da, müsbət irəliləyişlərin olduğu deyilir.
Ankara 1993-cü ildə Dağlıq Qarabağ münaqişəsində Azərbaycana dəstək olaraq Ermənistanla sərhədini bağlamışdı.
Türkiyə şərq sərhədini yenidən açmaq istədiyini, ancaq Ermənistanın Türkiyənin mədəni və dil əlaqələri olan Azərbaycanla sülh müqaviləsi imzalaması şərti ilə olduğunu bildirmişdi.
Görüşdə həm də İran-İsrail gərginliyi, regional təhlükəsizlik, Cənubi Qafqazda nəqliyyat layihələri və iqtisadi əməkdaşlıq imkanları da müzakirə olunacağı bildirilir.
