İran prezidenti Məsud Pezeşkian Azərbaycanla Naxçıvanı birləşdirəcək və Ermənistan üzərindən keçəcək “Zəngəzur dəhlizi” ilə bağlı İranın mövqeyini açıqlayıb.
Birinci24 informasiya agentliyi xəbər verir ki, avqustun 10-da jurnalistlərə danışan Pezeşkian deyib ki, məsələ ilə bağlı İranın bütün tələbləri təmin olunub.
“Əlbəttə, bu dəhliz xəbərlərdə şişirdildiyi kimi deyil. İran İslam Respublikasının nəzərdə tutduğu ərazi bütövlüyünün qorunması, Avropa ilə əlaqənin qurulması və şimal ilə əlaqənin kəsilməməsi çərçivəsi bu məsələdə təmin olunub”, – o bildirib.
“Yeganə narahatlıq doğuran məsələ odur ki, bu yolu bir erməni şirkəti və bir amerikalı şirkət tikmək istəyir,” – prezident əlavə edib.
Daha öncə İran xarici işlər naziri Abbas Araqçı da ABŞ şirkətinin tikintidə mümkün iştirakı ilə bağlı narahatlıq ifadə etmiş və məsələnin Ermənistan və Azərbaycan rəsmiləri ilə müzakirə edildiyini bildirmişdi.
“Biz hadisələri yaxından izləyirik”, – o qeyd edib.
O, həmçinin, bildirib ki, Ermənistanın xarici işlər naziri Ararat Mirzoyan ilə avqustun 11-də telefon danışığı baş tutacaq və Mirzoyanın müavini avqustun 12-də Tehrana səfər edəcək.
Avqustun 8-də Vaşinqtonda Azərbaycan ilə Ermənistan arasında sülh sazişinin mətni paraflanıb.
Sənəd iki ölkə arasında dövlətlərarası münasibətlərin qurulması və sülhün təmin olunmasını özündə əks etdirir.
ABŞ prezidenti Donald Tramp Azərbaycanın əsas hissəsini Naxçıvan eksklavı ilə birləşdirəcək “Tramp marşrutu”nun 99 illiyə ABŞ-yə verilməsini nəzərdə tutan sənədin, eləcə də Vaşinqtonun hər iki ölkə ilə ikitərəfli sənədlər imzaladığını bildirib.
