“Deməzdim ki, özümü sənətə qurban vermişəm. Bu ifadədən heç xoşum gəlmir. Sənətdə olan insanların bir çoxu bu sözü işlədir. Hansı sahədə işləməyindən asılı olmayaraq, o sahədə işləyib, həmin sahə ilə məşğul olursansa günlərini, aylarını, illərini ona verməlisən. Qurban vermək yox, sevə-sevə işləmişəm, özüm yaşamışam, özüm yaşatmışam. Təbii ki, elə məqamlar var ki, incəsənət o qurbanı tələb edir. Fədailər o qurbanı verir. Fədailər də aktyor və rəssamlardır. Teatr yaranan günündən hər zaman aktyorlar üçün çətin olub. Amma aktyorlar maddiyat üçün yox, mənəviyyat üçün yaşayanlar olub”.
Birinci 24 xəbər verir ki, bunu xalq artisti, Gəncə Dövlət Dram Teatrının aparıcı aktrisası Pərvanə Qurbanova deyib.
“Səhnədə olan insan üçün tərəf müqabili çox önəmlidir. Sən tərəf müqabilinlə püxtələşirsən. Tərəf müqabilinlə gündə bir addım irəli yaxud arxaya gedirsən. Ya tərəf müqabilini tapırsan, ya da itirirsən. Ya tam özünü xərcləyirsən, ya da onlardan qazanırsan. Mən çox şanslı sənət insanıyam ki, səhnəyə gəldiyim gündən elə böyük sənətkarlarla tərəf müqabili olmuşam ki, onlardan ancaq qazanmışam. Bu gün mən də istəyirəm ki, mənimlə tərəf müqabili olan gənclərə nəsə verim, nəsə qazandırım” deyə sənətkar bildirib.
Sənətkar bildirib ki, bir vaxtlar aktrisa olduğuna görə yaxınları ondan üz döndərib.
“O illərdə aktrisa olduğuma görə doğmalarım məndən üz döndərmişdilər. Elə illərim olub ki, ətrafım, qohumlarım məni danışdırmayıb. Ələxsus da dayılarım. Gəncədə aktrisa işləyəsən, həm ailəni saxlayasan, balanı böyüdəsən, həm sənətdə nəsə etməyi bacarasan, bu çox çətindir. Mən dişimlə, dırnağımla qazandım. Küsmədim, incimədim, qaçmadım. 2000-ci ildə xalq artisti fəxri adını alanda o dayım mənə zəng etdi. Dayım dedi ki, “Pərvanə vaxt var idi, ən birinci etiraz edənlərdən biri mən idim. Mən indi deyirəm ki, səninlə fəxr edirəm”. Onu qazanmaq üçün çox uzun, əziyyətli yol keçdim” deyə sənətkar bildirib.
Xalq artisti çəkildiyi “Yuxu kimi” serialından da danışıb.
“Çəkilişlər bəzən səhərə kimi davam edir. Kənardan hər şey asan görünə bilər. Bəzən elə olur ki, 3 dəqiqəlik epizodu 3 saata çəkirik. Çox şükür ki, böyük sevgi ilə çalışırıq. Mən “Pərvanələri rəqsi” serialında çəkiləndə artıq 10 il idi ki xalq artisti idim. Məni sənət adamları, Gəncə və Gəncəbasar bölgəsi tanıyırdılar. Rövşən İsax rayon teatrlarında olan aktyorları Azərbaycana tanıtdı. Rövşən İsax bizdən təbiilik, reallıq istəyir. Teatr tam başqadır, serial tamam başqa. Ona görə də teatr aktyorlarının seriala çəkilməsi bir çox hallarda çətin olur. Rövşən müəllim deyir ki, oynama, vəziyyəti izah et, özün ol” deyə sənətkar bildirib.
