Rusiya prezidenti Vladimir Putinlə Çin lideri Si Cinpin arasında qeyri-rəsmi görüş dörd saatdan çoxdur ki, davam edir. İki dövlətin liderləri bazar ertəsi Çin prezidentinin Moskvaya səfərinin ilk günündə görüşüblər. Görüş Moskva vaxtı ilə saat 16:36-da başlayıb. Əvvəlcə onlar Kremlin birinci binasındakı nümayəndəlikdə söhbət ediblər, sonra ünsiyyəti iş naharı zamanı təkbətək formatda davam etdirib. Hazırda dörd saatdan artıqdır ki, danışıqlar gedir.
Rusiya dövlət başçısının köməkçisi Yuri Uşakov bildirib ki, Kreml iki dövlət liderləri arasında təkbətək ünsiyyətə xüsusi önəm verir, çünki gözlənildiyi kimi ən mühüm məsələlərə görüş zamanı baxılacaq.
Eyni zamanda, Rusiya-Çin danışıqlarının əsas günü 21 mart nümayəndə heyətlərinin üzvlərinin liderlərə qoşulacağı gün olacaq. Bundan əlavə, Si Cinpinin çərşənbə axşamı səhər Rusiyanın baş naziri Mixail Mişustinlə görüşü planlaşdırılır.
