Vladimir Putin 2025-ci il üçün yaz hərbi xidmətinə çağırış haqqında sərəncam imzalayıb.
Birinci24 informasiya agentliyi xəbər verir ki, sərəncam çərçivəsində 160 min nəfərin hərbi xidmətə çağırılması planlaşdırırlır. “Novaya qazeta”nın bildirdiyinə görə, bu, son 14 ildə ən böyük hərbi çağırışdır.
Yalnız 2011-ci ildə daha çox çağırışçı qeydə alınıb – 203 min. Yazda baş tutacaq hərbi xidmətə çağırış təqvimə uyğun olaraq 2025-ci il aprelin 1-dən iyulun 15-dək həyata keçiriləcək.
Son illərin rəqəmlərini müqayisə etsək, görürük ki:
- 2022-ci ildə Rusiya Ukraynaya genişmiqyaslı hücuma başlayanda yazda 134,5 min, payızda isə 120 min nəfər orduya çağırılıb.
- 2023-cü ildə hərbi xidmətə çağırılanların sayı yazda 147 minə, payızda isə 130 minə yüksəlib.
- 2024-cü ildə artıq yaz aylarında 150 min, payızda isə 133 min gənc orduya çağırılıb.
Çağırışçılar aprelin 10-dan toplanış məntəqələrindən öz hissələrinə göndəriləcək. Rusiya Müdafiə Nazirliyi bildirir ki, çağırışçılar Ukraynanın işğal olunmuş ərazilərinə – “Donetsk Xalq Respublikası”, “Luqansk Xalq Respublikası”, Zaporojye və Xerson vilayətlərinə göndərilməyəcəklər.
