“Rusiya nüvə mübahisəsinə qarışmaq istəmir. Moskva vəziyyətin gərginləşməsində maraqlı deyil”.
Birinci24 informasiya agentliyi TASS-a istinadla xəbər verir ki, bunu Rusiya Prezidentinin mətbuat katibi Dmitri Peskov brifinqdə ABŞ Prezidenti Donald Trampın nüvə sualtı qayıqlarının Rusiyaya yaxınlaşması ilə bağlı bəyanatını şərh edərkən bildirib.
“Belə olan halda, Amerika sualtı qayıqlarının artıq döyüş növbətçiliyində olduğu açıq-aydın görünür. Bu, davam edən prosesdir”, – Peskov qeyd edib.
Kremlin sözçüsü həmçinin qeyd edib ki, Moskva vəziyyətin gərginləşməsində maraqlı deyil və bu cür ritorik döyüşlərin iştirakçısı olmaq istəmir.
“Əlbəttə ki, biz heç bir şəkildə belə bir mübahisəyə qarışmaq istəməzdik və bu barədə heç bir şərh vermək istəməzdik. Biz nüvə problemi ilə bağlı istənilən bəyanata qarşı çox diqqətlə yanaşırıq”, – o əlavə edib.
Peskov daha sonra Rusiyanın nüvə silahının yayılmaması mövzusunda çox diqqətli olduğunu qeyd edib.
“Prezident Vladimir Putinin mövqeyi hamıya məlumdur. Rusiya nüvə silahının yayılmaması mövzusuna çox diqqətlə yanaşır. Biz hesab edirik ki, hər kəs nüvə ritorikası ilə çox diqqətli olmalıdır”, – o əlavə edib.
Qeyd edək ki, avqustun 1-də ABŞ Prezidenti Donald Tramp iki nüvə sualtı qayığının Rusiyaya yaxınlaşması barədə göstəriş vermiş, Rusiyanın keçmiş prezidenti Dmitri Medvedevin nüvə silahından istifadə ilə bağlı eyhamlarına cavab olaraq ABŞ-nin Rusiya ilə nüvə müharibəsinə hazır olduğunu bəyan etmişdi. Avqustun 3-də isə Tramp jurnalistlərin sualına cavab olaraq, əvvəllər Rusiyaya göndərilməsi barədə göstəriş verilmiş nüvə sualtı qayıqlarının artıq aid olduqları yerdə olduğunu bildirmişdi.
