Nyu-York böyük jürisinin ABŞ-nin sabiq prezidenti Donald Trampa qarşı ittiham irəli sürmək barədə qərarı “siyasi təmizləmədir”.
Bunu martın 30-da “Fox News” telekanalının aparıcısı Taker Karlson efirdə deyib.
Bir müddət öncə Ağ evin sabiq rəhbəri özünə qarşı istintaqı 2024-cü il prezident seçkiləri ilə bağlı “cadugər ovu” adlandırıb.
“The New York Times” qəzetinin məlumatına görə, martın 30-da Nyu-Yorkun böyük jürisi aktrisa Stormi Denielsə pul ödəmək üçün “Trump Organization” kompaniyasının maliyyə sənədlərini saxtalaşdırması ilə bağlı Donald Trampa qarşı ittiham irəli sürülməsini dəstəkləyib. İttihama görə, vəkil Maykl Koen 2016-cı ildə keçirilən seçki kompaniyası zamanı Donald Trampla əlaqəsi barədə məlumat yaymaması, yəni susması üçün aktrisaya 130 min dollar ödəyib. Nyu-York Cənub dairə prokurorluğunun versiyasına görə, sabiq prezident sonradan “Trump Organization” kompaniyasının sənədlərini saxtalaşdırmaqla ödənilən həmin vəsaiti kompensasiya edib.
