Dünyanın nüfuzlu araşdırma şirkətlərindən olan Amerika İctimai Fikir İnstitutu (“Gallup”) tərəfindən Ermənistanda növbəti sorğu keçirilib.
“Gallup”un açıqladığı məlumatlara istinadən, keçirilən sorğuda vətəndaşlardan Ermənistanın Baş naziri Nikol Paşinyanın fəaliyyətini bəyənib-bəyənmədikləri soruşulub.
Sorğunun nəticələrinə görə, rəyi soruşulanların 13,9%-i Paşinyanın fəaliyyətindən tam razı olduqlarını bildiriblər.
Respondentlərin 24,1%-i isə digər siyasətçilərlə müqayisədə Paşinyanın fəaliyyətini daha çox bəyəndiklərini deyiblər.
Sorğuda iştirak edənlərin 38,7%-i Paşinyanın fəaliyyətini bəyənmədiklərini, 11,8%-i isə digər siyasətçilərlə müqayisədə bəyənmədiklərini açıqlayıblar.
Ermənistan prezidentinin fəaliyyətini isə respondentlərin cəmi 8,5%-i bəyənib, 42,4%-i isə bəyənməyib.
Bildirilib ki, sorğu aprelin 26-30-u tarixlərində bütün Ermənistan ərazisini əhatə edəcək şəkildə telefon zəngləri vasitəsilə aparılıb və sorğuda 1100 nəfər iştirak edib.
Onu da qeyd edək ki, “Gallup”un 2021-ci ildə Ermənistanda keçirilən parlament seçkiləri zamanı apardığı sorğuların nəticəsi reallıqdan çox uzaq olub. Məsələn, 2021-ci ilin iyun ayında keçirilən sorğuda vətəndaşlardan iyun ayının 20-də keçiriləcək növbədənkənar parlament seçkilərində kimə səs verəcəkləri soruşulub.
“Gallup” bildirib ki, sorğuda iştirak edənlərin 25,2%-i baş nazir səlahiyyətlərini icra edən Nikol Paşinyanın rəhbərlik etdiyi “Mənim addımım” partiyasına səs verəcəyini deyiblər. Amma, xatırladaq ki, “Mənim addımım” partiyası 2021-ci il seçkilərində 53,9% səs toplayıb.
