Azərbaycan Mərkəzi Bankının Naxçıvan Muxtar Respublikasındakı idarəsi bölgədə yeni valyutadəyişmə məntəqələrinin fəaliyyətə başlaması üçün aidiyyəti üzrə müraciət edib.
Birinci 24 xəbər verir ki, bunu idarənin rəisi Elçin Əliyev bildirib.
“Hazırda Naxçıvanda valyuta mübadiləsi banklar və 1 özəl valyutadəyişmə məntəqəsi vasitəsilə aparılır. Gələcəkdə muxtar respublikaya turist axınının artacağını nəzərə alaraq valyuta dəyişmə məntəqələrinin sayının artırılması ilə bağlı müraciət edilib”, – deyə o qeyd edib.
İdarə rəisi həmçinin deyib ki, hazırda Naxçıvanda xarici valyutaya tələbat aşağıdır: “Xarici valyutada qoyulan əmanətlərdə də azalma müşahidə olunur. Bunun da səbəbi milli valyutaya inamın artmasıdır”.
Bundan başqa, onun sözlərinə görə, hazırda muxtar respublikada nağdsız dövriyyənin artırılması ilə bağlı da tədbirlər görülür: “Bu istiqamətdə əvvəllər də müxtəlif dövlət proqramları icra edilib və bu işlər davam etdirilir. POS-terminalların sayı artırılır. Kommersiya bankları ilə əldə etdiyimiz razılığa uyğun olaraq onlar müxtəlif obyektlərdə POS-terminallar yerləşdirir. POS-terminal olmayan obyektlərlə bağlı isə “kölgə iqtisadiyyatı” mövzusunda maarifləndirici, maliyyə savadlılığını artıran söhbətlər aparılır”.
