Təxminən 2 milyon insanın heç bir qida mənbəyi olmadan yaşadığı Qəzza zolağında humanitar böhran getdikcə pisləşir.
Birinci24 informasiya agentliyi xəbər verir ki, bu barədə BMT-nin Ümumdünya Ərzaq Proqramı (WFP) məlumat yayıb.
“Qəzza zolağında humanitar böhran getdikcə pisləşir. Əksəriyyəti didərgin düşmüş 2 milyona yaxın insan hazırda heç bir gəlir mənbəyi olmadan yaşayır və ərzaq ehtiyaclarını ödəmək üçün tamamilə humanitar yardımdan asılıdır”, – Fələstinin WAFA xəbər agentliyi təşkilatın kommünikesindən sitat gətirib.
Kommünikedə qeyd olunub ki, kritik vəziyyət İsrailin mühasirədə olan Qəzza zolağına həyati əhəmiyyət kəsb edən ərzaq ehtiyatlarının çatdırılmasına mane olan sərhəd keçidlərini bağlamağa davam etməsi ilə daha da ağırlaşır.
Müxtəlif hesablamalara görə, tammiqyaslı hərbi əməliyyatlar başlamazdan əvvəl Qəzzanın əhalisi təxminən 2-2,5 milyon nəfər olub.
Qeyd edək ki, martın 18-də İsrail ordusu Qəzza zolağında hərbi əməliyyatları bərpa edərək anklav ərazisinə kütləvi zərbələr endirib və yanvarda yaradılmış atəşkəsə son qoyub. İsrailin baş naziri Benyamin Netanyahunun ofisi bunu Fələstinin HƏMAS hərəkatının danışıqlar zamanı vasitəçilər tərəfindən irəli sürülən təkliflərdən imtina etməsi ilə izah edib. O, sektordakı əməliyyatın məqsədinin bütün girovları azad etmək olduğunu bildirib. HƏMAS hərbi əməliyyatların yenidən başlamasında İsrail və ABŞ-ni günahlandırır.
