ABŞ və Çin arasında son vaxtlar gərginləşən ticarət münasibətlərində mühüm irəliləyiş əldə olunub.
Birinci24 informasiya agentliyi CNBC-yə istinadən xəbər verir ki, iki ölkə 90 günlük müddət ərzində qarşılıqlı idxal tariflərini 125%-dən 10%-ə endirmək barədə razılığa gəliblər.
Qeyd edək ki, bu razılaşma İsveçrədə keçirilən danışıqlar zamanı əldə olunub. ABŞ Maliyyə Naziri Skott Bessent danışıqların məhsuldar keçdiyini bildirib: “Cenevrə gölündə baş tutan bu proses, razılığın əldə olunmasına mühüm töhfə verdi”.
Bununla belə, ABŞ-nin bu ilin fevralında fentanilin qeyri-qanuni idxalına görə tətbiq etdiyi 20%-lik tariflər qüvvədə qalır.
Bu, Çindən idxal edilən məhsullara tətbiq olunan ümumi tariflərin 30% səviyyəsində qalacağı anlamına gəlir.
Çinin Ticarət Nazirliyi də məsələyə münasibət bildirib. Nazirliyin yaydığı bəyanatda vurğulanıb ki, Çin və ABŞ qarşılıqlı faydalı əməkdaşlığı davamlı şəkildə gücləndirmək və iqtisadi-ticarət münasibətlərini sabit və sağlam şəkildə inkişaf etdirmək niyyətindədirlər.
Eyni zamanda, tərəflər gələcək ticarət əlaqələrinin davamlı şəkildə inkişafı üçün xüsusi mexanizm yaradacaqlarını da açıqlayıblar.
Xatırladaq ki, 2025-ci ilin fevralında ABŞ Prezidenti Donald Tramp fentanilin qeyri-qanuni idxalını əsas gətirərək, Çindən gətirilən məhsullara tətbiq olunan tarifləri 10%-dən 20%-ə, daha sonra isə 125%-ə qədər artırıb. Çin də buna cavab olaraq aprelin 12-də ABŞ mallarına 125%-lik tarif tətbiq edib.
Tariflərin azaldılması xəbəri maliyyə bazarlarına da müsbət təsir göstərib. Nasdaq fyuçersləri 3,6%, S&P 500 fyuçersləri 2,8%, Dow Jones fyuçersləri isə 2,3% artıb. Pan-Avropa Stoxx 600 indeksi 0,7% yüksəlib. ABŞ dolları isə son bir ayın ən yüksək səviyyəsinə çatıb.
