Xəbər verdiyimiz kimi, Səudiyyə Ərəbistanının paytaxtı Ər-Riyadda Rusiya və ABŞ arasında Ukraynada müharibəyə son qoymaq üzrə danışıqların birinci mərhələsi başa çatıb.
Birinci24 informasiya agentliyi xəbər verir ki, görüşdə Ukrayna və Aİ ölkələrinin nümayəndələri iştirak etməyiblər.
Məlumata görə, nümayəndə heyətləri bağlı qapılar arxasında dörd saat yarımdan çox müzakirə aparıblar.
Rusiya və Amerika nümayəndə heyətlərinin üzvlərinin bəyanatlarını təqdim edirik:
ABŞ:
“Görüş konstruktiv keçib. Bundan yaxşı nəticə təsəvvür edə bilməzdik. Ukraynada müharibə üç ildir davam edir və hələ də heç kim onu dayandıra bilməyib. Ona görə də münaqişə tərəfləri bir-biri ilə danışmağa başlamalıdır. ABŞ-nin müttəfiqləri ilə məsləhətləşmədən Rusiya ilə əlaqə saxlaması ilə razılaşmırıq, əslində onlarla hər gün əlaqə saxlayırıq. Avropa ölkələri Ukraynaya təhlükəsizlik zəmanəti verməli və öz təhlükəsizliyinə ÜDM-in 2%-dən çoxunu xərcləməlidir”.
Rusiya:
“Danışıqlar hörmətlə və sakit şəkildə aparılıb. Bir-birimizi dinlədik, eşitdik. Bayden dövründə hökm sürən təcrid məntiqi indi rədd edilib. Amerika tərəfi bəyan edib ki, iki fövqəldövlət ünsiyyətdə olmaya bilməz. Biz səfirləri geri qaytarmaq, Ukrayna üzrə ayrı-ayrı danışıq qrupları təyin etmək və iqtisadi əməkdaşlığı inkişaf etdirmək (o cümlədən Arktikada) barədə razılığa gəldik. Putinlə Trampın görüşünün vaxtı hələlik məlum deyil”.