İranın xarici işlər naziri Abbas Əraqçi ABŞ prezidentinin xüsusi elçisi Stiven Uitkoffa Tehranın nüvə proqramı üzrə müvəqqəti razılaşmanın əldə olunmasını müzakirə etməyi təklif edib.
Birinci24 informasiya agentliyi xəbər verir ki, bu barədə öz mənbələrinə istinadən “Axios” portalı məlumat yayıb.
Bildirilib ki, Romadakı məsləhətləşmələr zamanı Əraqçi qeyd edib ki, tərəflər ABŞ Prezidenti Donald Trampın təklif etdiyi 60 günlük müddət ərzində nüvə proqramı üzrə yekun razılığa gələ bilməyəcəklər:
“Nazir xüsusi nümayəndəyə mümkün sazişin təfərrüatlı texniki xüsusiyyətlərini nəzərə alsaq, iki ay ərzində danışıqları yekunlaşdırmağın çox çətin olacağını bildirib.
Uitkoff Əraqçiyə deyib ki, o, hazırda müvəqqəti sazişi müzakirə etmək istəmir. Əvəzində o, diqqətini 60 gün ərzində hərtərəfli razılaşmaya yönəltmək istəyir”.
Eyni zamanda, portalın mənbələrinə görə, Uitkoff əlavə edib ki, əgər bu son tarix yaxınlaşdıqca, hər iki tərəf əhəmiyyətli dərəcədə daha çox vaxt lazım olduğuna qərar verərsə, müvəqqəti razılaşma ideyasına qayıda bilərlər.
İranın BMT missiyası nəşrin məlumatını təkzib edib: “Bu, sadəcə olaraq doğru deyil və reallığa uyğun gəlmir”.
Dövlət Departamenti şərh verməkdən imtina edib.
